Microsoft Excel 2010 дастурида ВПР функцияси

Microsoft Excel 2010 дастурида ВПР (Вертикальный ПРосмотр) функцияси жадвал ёки диапазонда биринчи устундан маълум бир маълумотни излаш ва шунга кўра бошқа устундан керакли маълумотни олишда фойдаланилади.

Ушбу функциядан фойдаланиш учун керакли катакча (ячейка) га курсорни қўйиб, формула қўйиш белгиси ƒ_xбосилади. Очилган "Мастер функций" ойнасидан ВПР функцияси танланади ва ОК босилади.

Натижада функциянинг аргументларини киритиш сўралган ойна очилади.

ВПР функциясининг аргументлари қуйидагича:

Искомое_значение. (Қидирилаётган қиймат). Мажбурий аргумент. Жадвал ёки диапазоннинг биринчи устунидан қидириладиган қиймат.
Таблица. (Жадвал). Мажбурий аргумент. Маълумотлар жадвали ёки диапазони. Айнан шу жадвалнинг биринчи устунидан биринчи аргументдаги қиймат қидирилади ва кўрсатилган устунидаги қиймат функциянинг натижаси сифатида қайтарилади.
Номер_столбца. (Устун рақами). Мажбурий аргумент. Иккинчи аргументда кўрсатилган жадвалдан функциянинг натижаси изланиши лозим бўлган устун рақами.
Интервальный_просмотр. (Интервал кўриш). Ихтиёрий аргумент. Функция аниқ ёки тахминий натижани қайтаришини аниқловчи мантиқий қиймат. Бу аргумент ИСТИНА (Ҳақиқат) ёки ЛОЖЬ (Ёлғон) кўринишида бўлади.

Агар мазкур аргумент ИСТИНА (Ҳақиқат) ёки тушириб қолдирилган бўлса, аниқ мос келган натижа қайтарилади, аниқ мос келган натижа бўлмаса, биринчи аргументда қидирилаётган натижадан кичик бўлган энг катта натижа қайтарилади. Бунда иккинчи аргументда кўрсатилган жадвалнинг биринчи устунидаги қийматлар ўсиб борувчи тартибда тартибланган бўлиши керак. Акс ҳолда функция нотўғри натижа қайтариши мумкин
Агар мазкур аргумент ЛОЖЬ (Ёлғон) кўринишида бўлса, функция фақат аниқ мос келган натижани излайди. Бунда жадвалнинг биринчи устунидаги қийматлар ўсиб борувчи тартибда тартибланган бўлиши шарт эмас. Агар биринчи аргументда кўрсатилган қийматга мос келадиган бир неча аргумент топилса, мос келадиган биринчи натижани қайтаради. Биринчи аргументга аниқ мос келадиган бирорта натижа топилмаса, натижа сифатида #Н/Д хато қиймати қайтарилади.

Мисол сифатида қуйидаги жадвални кўриб чиқамиз:

Ушбу жадвалнинг A устунидан "8" қийматини қидириш ва унга B устунида қандай қиймат тўғри келишини топиш талаб этилсин. У ҳолда формула қуйидаги кўринишга эга бўлади:

=ВПР(8;A1:B10;2;ЛОЖЬ)

Мазкур формулани масалан C1 катакчасига киритиб Enter тугмасини боссак, функциянинг натижаси сифатида C1 катакчасида "Саккиз" қиймати ҳосил бўлади.

Агар формулани =ВПР(8;A1:B5;2;ЛОЖЬ) кўринишида ўзгартирсак, унда натижа #Н/Д хато қиймати бўлади, чунки A1:B5 жадвалининг биринчи устунида "8" қиймати йўқ.

Агар ушбу берилган жадвалда формулани =ВПР(5,5;A1:B10;2;ИСТИНА) кўринишида ўзгартирсак, натижа "Беш" бўлади. Чунки юқорида айтиб ўтилганидек, Интервальный_просмотр аргументи ИСТИНА бўлса, у ҳолда функциянинг натижаси сифатида "аниқ мос келган натижа қайтарилади, аниқ мос келган натижа бўлмаса, биринчи аргументда қидирилаётган натижадан кичик бўлган энг катта натижа қайтарилади". Бу жадвалда 5,5 қийматдан кичик бўлган энг катта қиймат бу 5 қийматидир. Шунга кўра функциянинг натижаси "Беш" бўлади.