Google Android-планшетлар билан хайрлашмоқчи эмас

Сўнгги кунларда Android расмий сайтида "Планшетлар" бўлими кўринмай қолди. Натижада 5 та бўлим қолганди: PHONES, WEAR, TV, AUTO ва ENTERPRISE.

 

Бу нимани англатади?

ОАВ дарҳол қуйидагича тахмин қилди: Google Android-планшетлар билан бутунлай хайрлашмоқчи. Мантиқан ўйлаб қаралганда ҳам, охирги пайтларда планшетларга талаб сезиларли камайган. Қолаверса, корпорациянинг ўзи ҳам Chrome OS операцион тизимини фаол тарғиб этмоқда. Жорий йилда ушбу операцион тизимдан нафақат ноутбук ва шахсий компьютерларда, балки планшетларда ҳам фойдалана бошлашди. Март ойи охирида Acer Chromebook Tab 10 - дунёдаги биринчи "хромпланшет" Chrome OS бошқаруви остида ишлаб чиқарилган эди.

Нега ўчирилди?

Бир муддат ўтгач, Google нинг ўзи барча миш-мишларга чек қўйди. Маълум бўлишича, бўлим хатолик туфайли ўчиб кетган экан. Android ишлаб чиқиш бўйича катта вице-президент Хироши Локхаймернинг Twitter да хабар қилишича, сайтни янгилашда TABLETS бўлими тасодифан ўчиб кетган. Ҳозирда эса мазкур бўлим ўз жойига тикланган.

Oops we had a bug when we updated the site. It's back up now. Sorry for the confusion! https://t.co/5mI3L3Gzif

— Hiroshi Lockheimer (@lockheimer) June 3, 2018

gagadget.com сайтидан таржима қилинди.